雖然已經秋天，但千祈唔好睇小呢隻秋老虎，好似前日坐姐夫Billy架車陪阿媽去搭昂坪360咁，熱到流晒汗，玩完返去架車度，嘩！車廂仲好似焗爐咁。Billy突然攞個噴水壺出嚟唧幾嘢，唔使兩、三分鐘，冷氣都未開，車廂已經無咁熱。我見Billy個樣咁得戚，咪寸佢：「唓，噴水之嘛。」佢畀個壺我聞吓，噢，原來有酒精喎！
Billy話市面有啲車廂冷卻劑，其實都係由酒精同水做之嘛，所以佢自己溝大約一份酒精，加九份清水落個大約500毫升嘅噴壺度：「車廂冷卻劑DIY，又平又好用。」
後來中大生物化學系客席教授曹宏威同我講，水份蒸發嘅時候，會消耗咗周圍嘅熱能量，所以喺空氣噴水可以減低附近溫度；又由於酒精嘅蒸發速度快過水好多，所以有酒精嘅水，可以更加快令周圍嘅溫度降低。佢仲話，因為酒精水蒸發得好快，就唔會搞到車廂濕晒。
逢周一至周四刊出