堂食，仲要熱食，仲要係海鮮餡，講緊乜？講緊月餅！發牙痕即興想嗒番個月餅，我有好介紹，唔係大大盒傳統蓮蓉蛋黃月，亦唔係凍冰冰乜味都出齊嘅冰皮月餅，而係龍躉、瀨尿蝦、龍蝦等海鮮餡月餅，捧上枱熱辣辣有煙出，仲可以舞刀舞叉𠝹開逐件食，夠過癮嘞啩？
記者︰方綺君
攝影︰陳偉強、陳盛臣
模特兒︰Mavis、Michelle、阿駱、阿軒
每日限售50個
月餅年年有新味道，紅豆冰、朱古力、楊枝甘露、榴槤……真係乜Q味道未見過？諗住今年月餅都係咁上下料子，點知仲有大發現──海鮮餡月餅！聽到，我第一個反應係︰「有無聽錯呀！咁得意？」等唔切，第二日即刻仆到去試；睇到，我第一個反應係：「嘩，有煙出喎！」海鮮月餅大小似冰皮月餅，外層係傳統月餅皮，表面睇同普通迷你月餅無乜分別。「龍皇酒家」大廚權哥話︰「都要試味㗎，做海鮮月餅最緊要用生猛靚海鮮，用普通魚口感無咁好，試過好多海鮮，最後揀咗龍躉、瀨尿蝦同龍蝦呢3隻海鮮做餡，效果都幾好。」一來因為健康，二來因為焗海鮮會出水，所以權哥改用南瓜茸、綠豆茸同芋頭代替蓮蓉，方便吸收水份，又因為要保持新鮮，所以每日只限量賣50個，想試真係要快。
龍躉月餅每個$48（a）
圓形，揀野生龍躉魚腩部位加綠豆茸做月餅餡料，魚肉入口彈牙滑到痹，魚味超濃郁，最過癮係熱辣辣口感，個人推介之選。
沙巴龍蝦月餅每個$48（a）
心形，用沙巴龍蝦做材料，龍蝦肉質爽甜有鮮味，配合口感極好嘅日本南瓜茸，清香甜味代替蓮蓉，咬落一啲都唔覺膩。
斑馬瀨尿蝦月餅每個$48（a）
方形，用《美女廚房》都用嘅王牌海鮮斑馬瀨尿蝦同芋茸做餡，肉質比一般瀨尿蝦鮮甜，每隻有10吋長，蝦肉軟滑勁鮮甜。
山楂仙果月兩個$48（b）
食完熱辣辣海鮮月餅，嫌唔夠喉不如試埋「帝京軒」推出嘅山楂仙果月，Size同樣的的骰骰，做飯後點心最合適。中餐行政總廚陶國檢師傅話︰「食太多傳統月餅好漏，所以特登做個山楂月餅，健康啲，做甜品同點心都一流。」用煮熟的山楂打成茸，加入提子、芒果、菠蘿、西梅及柑桔5種涼果，外包自家製月餅皮，師傅話︰「要分幾次焗，咁樣焗出嚟先會最靚。」
食客有Say
今年月餅包裝靚
雖然政府大力鼓勵月餅包裝設計要簡約要減少污染，不過送得禮畀人，都係揀個包裝精美嘅好，其實靚包裝唔一定浪費嘅，因為個餅盒仲有其他用途吖嘛。
精裝禮盒迷你蛋黃白蓮蓉月餅 兩個裝$98
外形似傳統花燈，極具節日色彩，顏色有紅金兩款，硬皮夠穩陣，裝月餅嘅空格有絨布墊底，可以做首飾盒。大大個月餅盒本身已經係個靚靚擺設，盒蓋有隻花蝴蝶，配合埋盒身嘅蝴蝶花紋，靚爆呀。（b）
迷你酥皮奶皇月餅$138
全港首創燈籠造型禮盒包裝，食完月餅可以即時拎上手玩，連燈籠錢都慳番，外形又比一般懷舊燈籠精緻，仲係限量版，唔行快步買就無喇。（c）
米奇皇帝豪華茶葉杯碟月餅禮盒 $228
大大個禮盒有齊茶葉、米奇杯碟、雙黃白蓮蓉月。裝月餅嘅鐵盒分別有古裝打扮嘅米奇、米妮、唐老鴨同高菲圖案，下年未必再出，今年唔買仲等乜？（d）
米奇七星伴月餅禮盒 $188
硬皮外盒夠Eyecatching，硬淨夠睇頭，打開入面有8個顏色繽紛嘅鐵盒，最啱存放瑣碎雜物。一次過有咁多個卡通人物鐵盒，廸士尼Fans必買。（d）
軍曹長方月餅禮盒$89（左）、軍曹背包禮袋月餅$79
小朋友最鍾意Keroro，食完月餅仲可以用附送嘅軍曹透明袋同背包返學同去街，仲有襟章送，不過老實講大人用就唔多啱用喇。（d）
低脂芝士四式冰の皮月餅 8件裝$143
嘩！阿嬌同阿Sa三點式，我諗唔理入面裝乜大家都會買，如果係黃玉郎Fans就更加咪走寶，Twins漫畫肖像出自黃生，造型咁可愛，最啱死硬派Fans。（e）
搵食攻略
（a）龍皇酒家（28669932）
地址：灣仔軒尼詩道33號皇悅酒店地庫2層
（b）帝京軒（26226161）
地址：旺角太子道西193號帝京酒店3樓
（c）龍苑中菜廳（23151006）
地址：尖沙嘴彌敦道50號金域假日酒店第一層地庫
（d）Greatfoodhall（29189986）
地址：金鐘太古廣場二期地庫
（e）名古屋
查詢熱線：24223211