今明兩天係歐冠日子，本以為可以睇好波，點知，自己心儀嘅賽事無得睇電視直播！畀咗錢都無得睇，呢個乜嘢世界？你唔好迫我……大家明啦！
歐冠以前唔使錢睇，小弟亦無要求場場睇晒。但係家吓要畀成嚿水，當然有要求啦！以為畀錢可以睇到好波，點知答案係唔肯定，因為唔係場場都可以睇。
想睇？要再畀多啲，上網可以睇。呢個係乜嘢世界，小弟好似被騙一樣，無得睇心儀賽事！呢啲營商手法，同內地部份奸商有乜分別！不如絕啲，上半場可以睇直播，下半場想睇就另外收錢。我係小市民，依法守法，唔做犯法嘢，唔好迫我上梁山！
曼聯跌watt兵工廠上力
講返今明兩日啲歐冠，曼聯作客賓菲加，我覺得九死一生！大家睇過上場佢對雷丁，好辛苦地搶返1分，如果以咁嘅表現去到葡萄牙，死得！反觀阿仙奴就開始上力，主場對波圖，我有信心！
至於重頭戲當然係明晚嘅賽事國米對拜仁，始終都係睇高拜仁一線，原因好簡單，國米無隊型！另外，華倫對羅馬，本來五五波，但係我係華倫fans，兼且睇到華倫對住巴塞，高水準之餘仲防守力超強，所以我點都撐華倫！
周鵬
商業1台《球迷集中贏》主持
電郵：[email protected]