計馬會公開嘅數字，好多人當然仲覺得足球博彩與賽馬仍有一大段距離，但其實「外國足球」這股賭風已不可抵擋，係時候慎重考慮在短期內推出「走地」讓球盤。
漸受歡迎難阻洪流
以英超播映權為例，有經濟分析員估計，若然收費台下季損失這個王牌節目畀「現在」台，起碼流失10-20％嘅用戶，證明足球台（有得睇住賭）確係一舊各大台唔知係雞肋（競投播映權屬天文數字）或者「肥肉」，但仍要死搶嘅地盤。
政府雖然將足球博彩合法化這個權杖交予馬會，但後者以循序漸進方式推行新玩法，唔係太跟得上潮流（賠率亦唔吸引），除非佢哋唔係好想足球投注額終有一天趕過賽馬，或者想將這股洪流嘅速度減慢，否則應該係時候推出甚受歡迎嘅「走地」讓球盤。
香港或者國內唔少酒吧或者消費場所，喺當眼地方擺放電腦供顧客上國內網站，查最新嘅比賽賽果；唔單止咁，連結到國內非法網上投注足球博彩嘅網頁之多，相信已不是甚麼秘密。
最厲害係他們能夠掌握各地大小賽事嘅比賽形勢，即時讓客戶上網投注「走地」讓球盤，例如車仔上個禮拜六原本作客讓富咸一球/球半，去到60分鐘仲未入到波，「走地」亞洲盤大約已去到半球中水，而且每分鐘賠率都在變動，對好多賭仔實在感到相當刺激！
不來梅係時候反底
不只這類大路賽事，連澳洲聯賽都有「走地盤」，究竟係佢哋神通廣大，定係我哋香港馬會保守？
若然推出「走地」讓球盤，估計投注額會大幅上升，其實足球博彩都有好多大戶，不過佢哋好多都唔係幫襯馬會啫！
貼士時間：周中焗賭歐冠盃，計盤路及氣勢，個人認為巴塞開始回落，加上主場嘅不來梅盤路5不勝，差不多係時候反底，決博一注「主勝」兼「大」，看官同意否？
文：蘋果波神