保釣行動委員會噚晚八點喺中環遮打花園以「保釣再上路」做主題，舉行「悼念陳毓祥」追思會。「釣島尚在淪陷，同志仍須努力」，台上白底黑字寫住呢句震撼人心嘅口號，但台下除咗約600名本港保釣人士外，仲有兩名嚟自梳打埠嘅代表，但內地嘅保釣人士就一個都搵唔到。
八方側聞內地保釣領袖童增個助手張立斌，噚日朝喺深圳準備過關嚟香港參加追思會時，突然遇上阻滯，無法出境，令到原本安排咗張先生講嘢嘅大會環節要被迫臨時更改，認真冇癮。保釣人士阿牛抱怨話：「呢頭國家話經濟起飛，嗰頭釣島仍然淪陷。國家成日都話佢會處理，等咗10年喇，𠵱家仲係咁！」
今次拎咗成100萬出嚟保釣嘅商人劉夢熊噚晚有啲激動咁同八方講話：「陳毓祥殉國10年，佢本來有妻有兒，生活安定，去保釣只為天下興亡、匹夫有責。我要喺呢度同大家呼籲：愛國熱情不減，保釣熱血未冷，炎黃子孫都應該捍衞釣魚台，繼承陳毓祥嘅遺志。」