金利來曾憲梓位二公子曾智雄本來低調，但因佢位分居太太吳嘉寶一個廣告，稱有楊姓女藝人破壞其婚姻，佢忽然成為紅人。
曾智雄噚日以香港青年聯會主席身份，出席香港各界青少年「慶回歸迎奧運」活動，即時成為焦點，連何志平都俾記者冷落。曾智雄本來想扮打電話走人，後來避無可避，惟有又再交代多一次。對於有報道指佢分居太太因壓力避走美國，丟低一對年幼仔女響加拿大；又話將會無曾家家產分云云，佢一一否認，仲話太太好錫仔女，絕對唔會丟低佢哋。
曾智雄又呻成件事「十成都係假」，再三強調無第三者，離婚亦係舊聞，仲話自己唔會咁小器，太太亦唔會無屋分，「絕對唔會，間屋係我嘅，我哋之間雖然無緣份，但我對家庭、仔女都會有責任，會照顧佢哋。」
咁二少奶登完報又否認，記者問佢會否擔心太太精神出現問題？二公子就話：「其實我哋分開咗兩年，我每三個月就返加拿大探仔女，每次同太太都好正常咁傾偈，我覺得佢好平常。」佢又話老竇曾憲梓喺呢件事上無畀過壓力，因佢老人家完全唔知情。曾智雄臨走仲苦口苦面叫大家唔好再上網猜女星，因為「點估都輸、邊個都錯」，八方話楊采妮因為佢搞到日日俾人跟影，佢就話要同楊采妮講句：「對唔住！」
講番個活動，噚日出席啓動禮嘅特區少年都係1997年7月1日出世，大會都話唔知點解搵到嘅都係女仔。呢樣嘢唔知有乜啓示呢？