中午飯局上見到泰國專家R在座，當然捉住佢問幾句，專家R係華裔泰國人，往來曼谷香港經商數十年，對泰國高層瞭如指掌。佢自曼谷法政大學畢業，呢間大學係以文科、社會科學、會計、法律最叻，而好多人都熟悉嘅朱拉隆功大學就以理工醫著名。泰國學制係三三四制，每年中六畢業生之中，最叻嘅理科生一定撲到入朱拉隆功，有意於文社商法嘅就湧入法政。發展下來，泰國啲著名賓架、律師、法官、政治人物、記者等以法政畢業生為多，文人政府嘅總理部長又以法政生人數佔優，專家R啲校友喺泰國叱咤風雲，以前已經有幾位同學做過部長。
專家R話呢次政變，令到佢有高官（部長級）校友被軍人軟禁，靜候發落，未摸清形勢之前，唔會返去住。賓架F挑戰專家R：「現在係民主時代，啲軍佬點可以出蠱惑，槍桿子出政權，咁樣推翻他信，無論他信點樣唔啱，都係於理不合，於法無據噃！」專家R話：「國情不同也，到中國，你唔會得罪胡錦濤；喺泰國，點可以開罪泰皇！他信神神哋，搞到人民上街示威要佢落台，泰皇畀佢強烈暗示，佢竟然借咗聾耳陳隻耳，詐儍扮懵，當聖上冇到，重想喺軍隊中摻沙子，鞏固個人實力㖭。泰國軍人傳統係：軍隊係皇上嘅，絕對效忠皇上，點輪到他信打橫行吖。我哋一早知道有此危機㗎嘞，不過他信唔鍾意聽反話，至有今日。」
七十四年來泰國有君主立憲制，當初軍人跋扈，視年青帝王為圖章，點知泰皇蒲眉蓬登基六十年，帝譽日隆，現在六十歲嘅總司令都係自細崇敬泰皇嘅。泰皇已經成為一個聖人，本身就係一個建構（institution），全世界所有君主嘅影響力，冇人可以超越之。他信竟然以為自己有農民支持（其實農民最聽泰皇說話），所以在進退問題上，自把自為，夠膽暗中排擠皇室親信，真係罪莫甚。專家R話我哋唔可以用英國式嘅立憲嚟睇泰國，軍人絕對唔可以在西方國家搞政變，但喺泰國只要講一句「保護皇上威名」，軍隊可以趕任何人下台。