【本報訊】凌晨3時回到家中，甫開門即見一團黑影一閃而過，說的不是鬼故事，而是藝人方力申昨日遇賊的經歷。一名黑衣賊昨日闖入方力申位於港島碧瑤灣的住所，遭方返家撞破，二人甚至面對面展開對話。疑匪及後攀窗逃去無蹤，點算後發現失去了一隻Omega手錶和一部手機，合共二萬多元。事件已交警方處理。 記者：黃君怡
方力申昨日接受本報電話訪問時承認住所昨晚遭賊入屋爆竊，他說：「噚晚凌晨3時10分左右，我用鎖匙開門返到屋企，當時屋企熄晒燈，冇人喺廳，見到有個黑影一閃，當時以為係細佬，於是叫細佬個名，不過冇人應。之後我開燈，發現唔見咗個黑影。」當時他手執一個內有海報的畫筒，當經過客廳中的美式桌球枱時，發現有人蹲在波枱下。
以為賊人是胞弟朋友
「我見到有個男人着住件黑色衫，短頭髮，年約30歲，當時我有疑問以為佢係我細佬啲朋友，所以就問佢：『你係邊個？』嗰個人就答番我：『做乜嘢呀？』我同佢相距唔夠兩米，大家對峙咗幾秒之後，個男人即刻走，跑咗去窗嗰邊就逃走咗，個賊人身上應該冇武器。」至於對方如何逃去，方力申說：「我屋企個窗冇鎖，我當時冇衝上前睇佢點走，因為我爸爸媽媽喺房入面瞓覺，我擔心個賊唔知有冇縛住佢哋，所以即刻入咗房睇，而細佬就喺房入面上網。」
經點算後，方力申發現其父失去了一隻約值港幣二萬元的Omega皮帶手錶和一部MotorolaV3型號手機，後者價值2,000多元。一家人驚魂稍定後，才由方力申致電報警。
問他有否感到驚慌，方力申說：「當時唔知發生咩事，一度以為係細佬嘅朋友，都有啲驚，反而屋企人就唔係好驚，爸爸媽媽搞掂晒啲嘢之後，都入番房休息。」至於會否加強家居保安？他說：「都會㗎，因為我啲窗冇窗花，所以我會加強屋入面嘅保安系統。」問他可認得竊匪樣貌，他說：「認得，不過警方未同我做人物拼圖，見番佢我都會認得。」
警察公共關係科證實，昨日凌晨3時22分，有人報案稱域多利道550號一單位被爆竊。報案人稱看到疑犯從窗口露台離去，經點算後發現失去一部手提電話。