公民黨若非太君子就係太一廂情願，過去幾個月按兵不動，真係喺度等陳四萬上馬？結果陳太一句，「我講過唔會選特首，你哋唔信啫！」一切落幕。咁𠵱家先起步搵人頂上，當然係遲得好緊要啦。
陳太唔選，白鴿黨收旗，君子黨有言在先，泛民一定有人出場向煲呔下戰書，於是上周公告天下有關推選2007行政長官選舉參選人嘅程序：第一輪先係18個羅漢（即執委）嘅層面進行，下個星期二即係10月3日敲定人選，名為執委代表；而為咗公平起見，普通黨員可於11月4日周年黨員大會推舉自己屬意嘅人選，同執委代表選過；最後當然會有一個人出線。
八方問點解搞得咁複雜，唔一次過搞點？知情人話主要係時間緊迫，要早啲交出人名去爭取選委支持，反正由核心先選出代表做吓嘢，好過大夥等。
嗱，北京就係咁睇你班泛民唔起，喺呢啲選特首嘅大是大非問題上，大家都應該當仁不讓，勇於接受挑戰。點知18羅漢中，民望最高嘅黨魁余大狀到最後關頭選擇同陳太一樣不去馬，而最想出戰嘅湯大狀又好似當年老鄧咁，太多辮子怕被人拉，於是三位直選議員中，梁家傑走唔甩，佢話「唔迴避」大概就係呢個意思。
選戰可輸民心可贏
係人都知傑哥仔女細、老婆嫩，本來98年升咗做資深大狀，可以開始搵真銀，點知泛民一個唔該叫佢上馬選議員，最後仲要空降東九，同工聯會民建聯硬撼，八方當時都話佢夠膽，今次如果傑哥又再次臨危受命，就只好狂笑一聲，真係時勢做英雄，去馬就去馬，義無反顧啦。
雖然18羅漢中，梁大狀唔係最年輕，但係𠵱家新興政治人物往往都只係40出頭，傑哥今年行年48，從政經驗少，但不算後生。
有高人話，傑哥冇陳太及余小姐嘅包袱，佢如果肯捱義氣單挑煲呔，可能會更精采，反正要真正辯論起嚟，煲呔未必有着數。大家唔好忘記西九一役，傑哥都贏得非常漂亮，連肥龍都被迫要投降。
傑哥扯起民主公義之旗同煲呔砌過，呢場仗雖然冇贏面，但係輸了選戰贏了人心，令煲呔勝之不武，令混賬制度現形，必定可以為香港實行普選推進一大步。
至於18羅漢是誰，除咗傑哥、余小姐，湯大狀外，仲有吳靄儀、譚香文、張超雄、關信基、鄭宇碩、黎廣德、陳家洛、毛孟靜、李志喜、余冠威、吳永順、容詠嫦、查錫我、賴仁彪、麥偉年（英國人）等，佢哋大部份係專業人士或學者，睇完張名單，捨傑哥其誰？