中國鐵娘子吳儀副總理噚日喺湖南同煲呔見面，佢讚煲呔領導下嘅香港經濟明顯復蘇，但無好明顯咁挺曾，貫徹中央最新挺得愈少愈好嘅指示。吳儀一向形象硬淨又爽朗，噚日佢接見煲呔時，就展現比較輕鬆嘅作風。
第一次係佢講講吓特區政府兆頭好時，忽然停低好猶豫咁問呢班來自廣東嘅客人：「聽到我說甚麼嗎？」與會者估唔到堂堂吳副總理都識搞gag，梗係哈哈大笑。後來佢講到支持陳馮富珍選世衞總幹事時，又突然好似發現新大陸，停低望向某處，話原來呢度都有外國朋友喎，跟住又用英文問佢聽唔聽得明自己講嘢，搞到大家當堂又輕鬆晒。
近日經常自誇「務實」嘅煲呔，噚日見吳副總理之前都好務實咁做咗好多嘢，好似出席完香港湖南經貿合作交流會後，就去咗湖南體育館參觀，睇小體操員練習，仲同奧運金牌得主，包括跳水名將熊倪、舉重嘅楊霞同打羽毛球嘅鞏智超見面握手。
煲呔見到呢班精英又好務實咁話自愧不如，讚佢哋有純熟技巧，又有驕人毅力，自己真係佩服。面對住咁大頂高帽，運動員都以禮相待，向煲呔送上畫集做紀念，皆大歡喜啦。