鑽石頸鏈就可以放喺保險箱，咁大架車可以放喺邊？唔少車迷有十架八架車，要儲呢啲價值連城的跑車或老爺車，點算好？有人學日本想出生意門路，專為班有錢佬提供Store車服務，日夜昅實架車，每日仲幫佢哋Run吓架車，保持最佳狀態，甚至可以預早講聲幾時出車，佢哋就會幫架車扮靚一番。呢個車夾萬位於銅鑼灣，基本Store車月費$4,000起，而銅鑼灣區停車場平均月租$3,000，加多$1,000就有埋專人服侍同24小時看守，唔少跑車車主都話有興趣，實用兼有噱頭喎。
記者：陸伊琳
攝影：伍慶泉
針對超級跑車
在跑馬地做開汽車美容的JAS，今個月殺入銅鑼灣謝斐道推出「名車夾萬」服務。除了提供汽車洗白白扮靚靚服務外，更幫客人Store車。「大部份客人都是超級跑車及老爺車車主，他們同時擁有多部名車，而家中最多只有兩、三個車位，不少人都為找地方儲車而煩惱，有時東區泊一架，西區泊兩架，大頭蝦到都唔記得自己架車泊喺邊。有見及此，我想出一門生意，就是專為這些豪客Store車，甚至每天找人Run一Run每架車，事關一架車一直唔開，之後就好難撻着，毛病亦應運而生。」負責人Jacky表示。車夾萬位於五層高的停車場，整個停車場都被佢哋包起晒，保安嚴密，謝絕參觀。各車主大可放心，出車前有需要，更可以要求打番個靚蠟，靚一靚先出動。
每月$4,000Store車服務
服務包括：
－24小時專人看管
－每日、定期撻車或Run車
查詢：JAS（22956333）
網址：www.jas-auto.com
William：泊咗架比賽專用車。
Fairlady車價$520,000（另改裝費$500,000）
家中有十多部跑車，其中有部專玩比賽的Fairlady就Store響JAS的車場，一來閒時不用，二來每逢出賽前後佢哋都會有專人打理，幫我清潔及打蠟，唔使煩。
Olivia：固定位唔怕刮花。
寶馬限量版CSL車價約$1,500,000
之前泊喺一般停車場被人刮花咗，心痛死，因為呢架是限量版碳纖頂，非常罕有，我又好怕俾人偷。我雖然喺銅鑼灣返工，都唔知有呢啲車場，要是有專人幫我看守架車，車場又就腳，諗得過，不過略嫌架車要搭𨋢。
Billy：貪佢閒人唔入得。
法拉利360車價$2,500,000
黃色嘅360好招搖，所以好擔心被人偷，自己喺銅鑼灣返工，畀多幾百元泊喺佢哋度比較安心，因為閒雜人都唔可以入佢哋啲停車場，信得過。
Frankie：保時捷要Keep住Run。
保時捷964二手價約$300,000
呢部係90年代初的經典款，我一個款有四架，所以要搵地方來擺車，而且其中一、兩架唔係成日揸。Store車可以幫我睇車之餘，仲幫我每日Run吓架車，Keep住狀態，服務幾細心，價錢都合理，因為我屋企附近泊車都要成三千幾一個月。
黃先生：太多車，試過唔知泊咗去邊。
法拉利Testarossa車價約$3,000,000
我家有十多部車，之前左泊右泊，唔記得咗自己將架車泊咗喺邊。Store呢架係80年代頂級款，唔見咗，有錢都買唔番。Store車服務集中睇住我啲車，而且佢哋對於保養清潔超級跑車有經驗，有大場合要揸Testarossa出去威，佢哋都可以幫我打番個靚蠟，清潔好才出車。
馮先生：再添新車會考慮。
平治SL500車價$1,500,000（另改裝$100,000）
因為我家都有車位，暫時還未需要呢項服務，不過呢個幫人Store車嘅服務都幾好。$4,000停車場費，響銅鑼灣區嚟講算合理，仲有專人打理，所以我覺得都OK，而且銅鑼灣地點唔錯，夠方便，之後添新車會考慮。
