航空母艦工行，十月中港同步招股，點知爆出上海市委書記涉嫌貪污被免職，市場擔心，究竟工行上海分行貸款會否被波及。
銀監會主席劉明康噚日喺香港演講時提到，銀行業要防備新增不良貸款湧現，其中一個方法係提高透明度，因為內地銀行有一個壞習慣，就係只將好消息話畀人聽，衰嘢就收收埋埋，因此劉主席話，鼓勵國有銀行排隊嚟香港上市，無非都係想分享啲「陽光」咁話。言猶在耳，記者後來喺演講會後見到劉主席，想問吓佢上述貪污案，會否波及工行？劉主席好簡單直接咁話，作為監管機構，不會討論市場傳聞。然後佢轉身就走！又係嘅，咁敏感嘅話題，都係少講為妙。
話時話，大家日後喺中大見到劉主席，可以改口叫「劉教授」喇，因為商學院已經邀請佢出任中大工商管理學院榮譽教授；原來，本身係經濟學者嘅劉遵義，亦同樣係國家統計局嘅國際顧問，聽聞，佢同劉明康互相認識十多年，噚晚劉遵義亦特地喺「府第」宴請劉明康。其實劉明康已經係城大、北大、清華及復旦大學嘅兼職教授。