港股突破向上後，連續兩日走勢都頗為反覆，噚日恒指一度創出今年日中新高17683，升82點，但在內地保險股同房產股逆轉的拖累下，倒跌收場，收市17546，跌54點。
國壽（2628）同平保（2318）再創出新高，國壽見16.82元，升0.82元；平保見29.60元，升0.90元；但升得急，落得亦快，國壽插落16元平收，平保更倒跌0.20元。國壽急回，傳言即起，話會有配股活動，其實兩股累積升幅大，回一回，好正常。
房產股除少數外，大多亦回得好急，中國海外（688）、越秀投資（123）同世茂（813）等，都跌成3至4%。房產股大勢仍向好，跌市係最佳低吸機會。
光大國際（257）又有勢，收0.86元，逆市而升4仙，成交再大增到4400多萬股，係上周五嘅5倍，短線要留意。
光國在0.80元至0.90元間已整固個多月，噚日一升，就拋離3條短期平均線同下降軌，MACD亦快出現「牛牛」入貨訊號，今日再上，升浪即可確認，短線目標係1.05元。
開始進入收成期
光國轉型環保已3年，今年開始將進入收成期。05年（12月年結），盈利1.05億元，升21.3%，每股盈利4.13仙；06年上半年，盈利7162萬元，升15%，每股盈利2.64仙。
集團手頭上有8個項目，4個在年中開始營運，餘下4個亦會在明年陸續營運。仲有，集團剛出售深圳媽灣電力權益，套現6.42億元，獲利3.25億元。
06年全年，光國盈利可大升，連同售電廠收益估計有4.7億元，每股盈利16.7仙，預測PE只係5.1倍，公司唔排除會派發特別股息。
07年，環保項目進入全面收成期，不計特殊項目，估計盈利可升至2.5億元，每股盈利8仙，以仍比環球同業為低的15倍PE計，股價已值1.20元。
郭兆誠