嘩！我係咪入錯舖頭？點解個個人都一身迷彩打扮？玩緊Wargame呀？睇真啲，原來係制服嚟嘅，不過迷彩同餐廳有乜關係先？原來「大家食」老闆呂以村以前當過兵，所以自己設計埋員工制服：「迷彩其實係我私人喜好，可能懷念以前做軍人嘅日子啩？𠵱家見員工着迷彩制服，感覺上好有紀律，我覺得望落去都亁淨衞生啲。」係咪真係有紀律就唔知嘞，不過我覺得着迷彩畀到客人充滿活力同年輕感覺，老闆即刻話：「係呀，軍隊入面多數都係年輕人嚟㗎。」鬼唔知咩？
Amy着起呢套迷彩衫，笑容滿面，睇嚟對套制服好滿意噃，「件衫設計得幾好呀，鬆身好舒服。顏色夠鮮艷，着住都覺得自己後生咗幾年。」顏色的確夠Sharp，Amy話送外賣特別方便：「對面街市成日叫外賣，唔使講實邊檔㗎，因為我一行入街市，叫外賣嘅人實認到我套迷彩，送外賣唔使周圍搵，反而係客人搵我㗎。」訪問完畢，一位侍應剛巧離開送外賣，行到街尾我都仲見到佢件迷彩衫，真係Sharp到爆呀。
記者：黃若茵
攝影：林栢鈞
賽狗肉削搖麵 $15
老闆話：「賽狗肉只不過係豬腿肉，抄煮狗肉做法咁解啫，豬肉夠腍，配豬骨湯底啱晒數。」削搖麵頗闊身，食落好鬼煙韌。
村村住家鍋麵 $23
老闆話：「北方鄉村有大時大節先會食呢個麵。」配料有牛肉、海帶、紫菜、洋葱等，麵條彈牙，難怪贏過今屆「食神爭霸戰」亞軍啦。
村村香串 每串$6
老闆話：「用內蒙古做法燒串燒，加咗好多北方地道香料㗎。」串燒有魷魚、雞翼、雞肫、牛𦟌等選擇，烤得好香，有驚喜。
大家食（23323683）
地址：旺角花園街5號地舖