國米中堅馬特拉斯喺世盃決賽，同退休「球王」施丹上演一幕「世紀一頂」，相信好多人都歷歷在目，但係當事人之一馬特拉斯就毫不避嫌，同運動著名品牌「一剔」拍咗個「鐵心口」廣告，搞笑嚟得都幾有諷刺意味！
呢條短片名稱係《MaterazziTraining》，約46秒長，係「一剔」品牌嘅意大利版廣告，唔知香港幾時有得播，如果想先睹為快，就可以click入上面條link欣賞吓。相信世盃決賽嘅「世紀一頂」都唔使我講，而條片就利用呢個Gimmick，用唔同方法嚟測試馬特拉斯個心口到底有幾硬，有幾堅！
一開始，馬特拉斯喺個人影都無嘅球場練波，唔知搞咩係咁用心口控波，控得兩控，突然個波變咗保齡球飛埋嚟，佢二話不說就當保齡球係足球咁控，保齡球安然無恙，佢心口受重擊後亦毫無異樣，認真神奇！之後……最後係點？當然留畀讀者自己上網慢慢睇啦！
網友意見有讚有彈
對於呢個廣告，網民就持不同意見，kathyanan謂：「好Cute呀，馬特拉斯好得意好可愛呀！:-)」rebefigo大讚：「嘩，我鍾意呢個廣告呀，好Ｘ正，我唔知點解啲人咁憎佢，我都唔明佢做錯乜嘢！」xbratxprincessx話：「超正呀，俾佢笑死！」mywords：「可以用一個字總結：『無聊』！」