經過一連三日嘅東京遊戲展，實在有太多PS3同Wii嘅新機消息，搞到中、日、台三地嘅GameForum都擠滿相關討論；其中最讓PlayStation迷歡迎嘅，肯定係SONY決定將PS3降價及重新加入HDMI高清輸出插頭。一直以嚟，PS3喺Game論壇都被大部份機迷抨擊賣得太貴，抽起HDMI更形同廢咗Blu-ray播片武功，家陣20GB版PS3落實約售港幣$3,300，即時令一班擁躉蒲晒出嚟，幾乎想開香檳慶祝！但諗深一層，北美首批貨得40萬部，日本更僅有10萬部派街，少成咁，炒上天價已成必然定律，官方定價$100都冇用！
筆者從東方188某Game舖得到確切消息，就係有位中東做生意嘅熟客，豪氣干雲地話：「不論PS3炒價如何，只要唔過一萬蚊，就勁掃200部返中東賣！」老闆仲估佢每部起碼執50%，即係成萬五蚊部PS3！唉，個市渴成咁，筆者對降價至$3,300價位反有點無奈嘅感覺。
記者：徐影龍
＊明天續談PS3降價策略得與失。
http://forum5.gamer.com.tw/B.php?bsn=60281