到最後，我哋都係決定放棄食燒雞，繼續幫部X3影相；但望望錶，發覺距離記者會時間仲有唔夠一個鐘，而且仲有差唔多80公里嘅路要行，所以都係快手快腳揸車走人。終於嚟到FrottmanningerHeide舉行記者會嘅地方，佢哋啱啱開始咗，大家食咗啲「輕量」午餐之後，就跟Instructor出去玩Off-road，路面初段都唔算太難，點知好戲在後頭，原來斜路頂有個大窿，踩咗入去會即時令部X3變咗用三個轆上山，跟住仲要落大斜路衝落水氹，嘩，好爽！不過，喺玩同影得開心嘅同時，有好多蚊滋喺旁邊飛嚟飛去，針到我呢……玩完Off-road就要趕住揸部車返起點，沿途景色雖然同去程差唔多，但係都OK喎！另外，今次所行路段車速可達120km/h，終於可以試埋新X3喺高速公路上嘅表現，哈哈，唔錯喎。
記者：鄭達基