美國汽油價格近期回落，當地有網民在《MSN》討論區發表陰謀論，指油價下跌存在政治因素，認為布殊政府正操控燃料價格，希望執政黨能在11月中期選舉中勝出。如果汽油價格真的一直跌到11月，駕車人士負擔大大減輕，真係飲得杯落！
網友Rojo26說，倘若汽油價格持續高企，執政共和黨休想在11月的美國國會中期選舉中勝出。美國現時由「油佬」話事（布殊是石油業出身），所以布殊政府和油公司會在油價上做手腳，希望㩒低油價，令執政黨可以順利勝出。
網民safeharbor37稱：「布殊政府如果有『食力』，可以將汽油零價㩒低到每加侖1美元（比現時約2美元低五成），共和黨在大選中便『贏硬』；但如果話布殊政府操控油價，講法卻有啲荒謬，不過，我懷疑布殊正倚賴其他人壓低油價，為大選鋪路。」
油價插水 共和黨贏硬
另外，《MSNMoney》的個人理財專欄主編布萊恩大膽預測：「汽油價格跌到每加侖1.15美元並非天方夜譚，到時美國人唔使為油價貴而煩惱，買架耗油量大啲嘅汽車都無所謂啦！」
不過，網友SpencerHall似乎不大認同布萊恩的預測。他說：「嗰啲專家就算預測錯誤，都唔會被炒魷魚；有啲經濟專家做咗二、三十年嘢，都冇喺錯誤中吸取教訓。」
報料電郵：[email protected]