為了外出工作謀生，任職保險經紀的阿芷另聘保母照顧6歲幼子焯禧，沒料到就此釀成慘劇。今年4月負責照顧焯禧的保母趕返內地時，未有與她取得聯絡便離去，留下焯禧獨自在家，結果他墮樓身亡，令阿芷內疚一生。最近她獲房屋署安排調遷到另一單位，以遠離傷心地，但她無力繳付水電煤雜費及搬遷費，盼獲援手。
「有邊個父母唔錫自己仔女，我唔想照顧佢，就唔會請保母睇住佢。」愛子墮樓身亡的五個月來，阿芷一直活在哀痛之中。
對於有人指其子出事前阿芷正與友人「打牌」，她感到百般受屈：「其實我同客人傾緊保險，如果唔係佢（保母）打錯我舊電話號碼，就唔會搞成咁。我係有責任，最大責任係交咗個仔畀一個唔應該信任嘅人。」阿芷對一次過失加上誤會釀成悲劇，甚感無奈。
與夫感情亮紅燈
早前法庭判保母疏忽照顧罪成，監禁八個月。阿芷想起兒子生前的可愛笑臉，始終無法釋懷。「就算判佢坐幾耐，我個仔都唔會返嚟。我唔係要追究佢，但係佢用我個仔有自閉症嚟辯護，真係好唔公平。」現時每當阿芷想起兒子生前精乖聰穎的表現，更感氣憤難平。「佢好精靈，有一次去朋友屋企，佢將人哋電腦嘅資料鏟走，再下載自己鍾意嘅網上遊戲，令大家哭笑不得，可惜……」
遭受喪子之痛，加上近月與丈夫感情亮紅燈，阿芷情緒異常低落，現時11歲長子是她的生存動力，她坦言現時將所有希望都放在大兒子身上。近日阿芷獲通知調配另一公屋單位，她寄望遷離舊居，可快點忘記傷心事。惟她辦理幼子身後事後，手頭的錢已所剩無幾，她根本無力支付搬遷所需的大筆開支，甚感惆悵，蘋果日報慈善基金體恤阿芷的經濟困境，撥款8,000元助她辦理搬遷事宜。
捐款編號：C2172