皇馬喺上周六嘅西甲聯小勝貝廸斯一球，聯賽兩連勝踏入正途，但「萬人迷」碧咸就濕滯咯，自03年加盟球會以嚟首次連續兩場聯賽坐冷板；皇馬𠵱家愈打愈似樣，如果喺周二對基輔嘅歐冠盃時，碧咸仲係做後備，佢就係時候諗諗，喺漫長球季點樣喺後備席搵娛樂喇！
隊長魯爾同樣慘情
31歲嘅碧咸可能已經踏入職業生涯嘅黃昏時間。上仗聯賽後備入替，單刀射入一粒嘅碧咸，不但要受俾麥卡倫一腳踢出國家隊之苦，𠵱家返到球會，仲要俾皇馬教練卡比路安排打後備，慘成「雙失壯年」（國家隊席位同球會正選），都算係男人之苦喇！
雖然皇馬表明會同今季約滿嘅碧咸續約兩年，但如果球迷未來都只係見到「萬人迷」坐喺板櫈到撥頭髮，同埋用迷人嘅眼神望住鏡頭，我求大俠都覺得幾感慨；除咗「萬人迷」外，連魯爾都冇情講要做後備，卡比路收起兩位就贏波，球迷想「插」都無位「入」啦！
皇馬呢3分真係得來不易，第500次為皇馬上陣嘅卡路士就俾對手撞到「爆缸」，用鮮血嚟慶祝里程碑；而同胞施仙奴仲黑仔，佢打咗半個鐘多啲就觸傷右膝韌帶，起碼要唞大半季，皇馬想翻身真係困難重重。
「皇馬呢場贏波都算係浴血球場，而且係近年少見嘅鬥志波，個個都輸波輸命，我求大俠就好希望佢哋喺周二對基輔嘅歐冠盃，都保持咁嘅比賽態度！」