唉，今次又會咁黑仔，由我哋清晨5點幾到埗，搞到差唔多中午12點先有房，真係咩商場、咩Showroom都俾我哋行勻晒，家陣終於有房，酒店解釋話因為啲房爆晒，所以先要搞到咁晏。唔緊要啦，都係行快兩步上去沖個靚涼瞓番陣，為聽日嘅試車做好準備。
第二日朝早9點，同國內及台灣嘅傳媒食完早餐之後，就行過去步程僅3分鐘嘅試車總部，聽取試車指示及攞車。今次試車嘅路線，第一部份係由慕尼黑機場行172公里，到達名為FrottmanningerHeide嘅記者會及玩Off-road場地。沿途只係見到一片又一片田野，悶就係悶咗啲，但起碼好過香港周街都係車吖！嚟到名為Buchbach呢個地方，我跟同行嘅行家決定喺呢度停車休息吓，順便幫部X3影番啲相，但呢個時候旁邊有部賣燒雞同三文治嘅車停喺我哋隔籬，一陣陣燒雞香味不停傳過嚟，搞到我哋都唔知影相好，定還是應該去買隻燒雞食……
記者、攝影：鄭達基