「香港良心」陳方安生選擇喺10月前正式宣布不會參加2007年特首選舉，呢個係好多人意料之事，陳太從來冇「講過」會選，只係話「見步行步」，大家（包括白鴿黨前主席李柱銘）一廂情願，對佢有期望，冇法子㗎。
馬丁向八方承認，陳太決定不選，相信香港好多人都好似佢咁好失望，因為當初阿太咁高姿態上街，大家都有幻想同美麗嘅寄望，民主派更諗住陳四萬係武林盟主，啲晚輩全部讓位，等佢攞住個政改方案同煲呔對質。點知演變成陳太向策發會提供意見，真係……咁即係大跌watt啦。
馬丁對陳太今次角色大轉移雖然唔多開心，但係都從積極面去睇，覺得有好過冇，始終民主大陣營多咗一個陳四萬加核心小組。
白鴿黨預先張揚唔會派人出選，八方問馬丁點解唔去馬，佢即刻答話等梁家傑啲後生出馬，仲讚傑哥為人正直。其實八方總覺得馬丁太保守，陳太不出，真係捨馬丁其誰？以佢從政多年嘅經驗，就算輸都輸得起，總算對自己及長期支持者有一個交代，亦為政治生涯畫一個美麗嘅句號。傑哥呢啲後起之秀，應該加以保護培育，日後一定大派用場；可惜冇前輩肯壯烈犧牲，泛民之可悲，盡在於此。