大家作為《金手指》嘅fan屎，都知道孫柏文對任何箝制言論自由嘅政策或法案都感覺非常反感，一定會反對。因為不單只言論自由可貴，仲要今時今日有互聯網，一個人要知、睇、聽任何有人肯發放嘅訊息，都係阻唔到。你問下花旗國政府，佢哋可唔可以阻止「亞蓋達」發放攻擊目標嘅指令？
所以，聽到有一個（就連我都要承認佢好無聊）自稱「真主教恐怖份子」嘅網友，因為問：「在座有冇人識整炸彈…我想炸廸廸尼…唔該」，畀人拉咗，我第一個反應就係做調查。我走去Google下「識整炸彈」呢四個字，發現雖然第一個搜尋答案，已經被攞走，不過下面嘅「頁庫存檔」仲有得睇，所以我就走去睇晒全部對答。
有人患咗肛門堵塞症
睇完之後，我就開始火滾，心裏面諗：「我哋納稅人辛辛苦苦交嘅稅，用咗去拉呢條muk嘴？」如果大家睇下整個對答，就會見到有人問佢，例如「咁你諗住自殺式定點樣呀？」或者「點解想炸呀？」等等問題嘅時候，呢位網友次次答嘅時候都有加個「笑」嘅信號。如果佢真係「亞蓋達」型嘅恐怖分子，我相信就憑佢每次答問嘅時候，都加個「笑」，佢都已經被佢班兄弟處決。點解？打聖戰呀，大佬！笑？！
其實，喺9月11日篇《金手指》裏面，我已經從我哋特區「唔使煩」恐怖分子襲擊嘅角度，講過點解「做特區好過做殖民地」，我亦講過笑聲、幽默，有治療「心靈創傷」嘅功用。今次睇完整個對答，我覺得整件事根本係我哋特區人民，眼見世界實在有太多荒謬嘅嘢，運用「諷刺性模仿」parody嘅手法，去紓緩我哋特區人民對世界嘅憂慮。雖然就連我都唔覺得個網友好笑，不過幽默感呢樣嘢，始終都係「各花入各眼」，今次最弊就係我哋特區有太多「風聲鶴唳，草木皆兵」，患有「肛門堵塞症」anallyretentive嘅人（要識別呢啲人，最容易嘅方法，就係問佢兩個問題：「第一，你讀中學嘅時候係唔係Prefect？如果係，第二就係當年你每日放咗學之後，有冇仲將個Prefect章戴係心口？」）。
會變滋生恐怖分子溫床
睇番警方話可能觸犯《刑事罪行條例》第54條，企圖導致爆炸意圖危害生命或財產罪，我即刻諗：「如果當日個網友問嘅只係「在座有冇人識整炸彈…唔該」，雖然冇觸犯《刑事罪行條例》第54條，不過恐怖程度肯定會比原先嘅問題高。一個真正想襲擊我哋特區嘅恐怖分子，睇到呢場鬧劇，肯定對自己可以成功襲擊嘅信心大大提高。就算唔係因警方「盲目捉賊」，只係見到我哋特區言論自由因為呢單少少事已經可以完全放棄，就知道長久下去，自由只會愈來愈少，民怨愈來愈高，即係話，我哋特區遲早都會變成滋生恐怖分子嘅溫床。
支持自由唔係一項「奢侈品」，可有可無，自由係一樣可以保證，長久落去我哋可以得到和平嘅方法。如果大家都唔想見到我哋特區變成滋生恐怖分子嘅溫床，就一定要爭取及保持我哋現有嘅自由。