街坊小炒無新意？錯喇！有舖仔新開張，唔Sell裝修擺明Sell創意，用鮮奶煮桂魚、將牛腩炸脆嚟食、咕嚕斑塊連成個柚子上……好聽啲你可以話係草根版Fusion菜，難聽啲你可以話係九唔搭八，不過我就乜都唔理，淨係知好味，食得飽，我勁Buy。
記者：黃若茵
攝影：譚盈傑
模特兒：Natalie&Angus
師傅自製兩款醬料煮餸，V醬其實解VIP醬，帶啲啲辣味，用嚟做V醬醬爆豬頸肉極惹味；妙醬則取「奇妙」之意，混合中國同東南亞配料製成，配帶有苦澀味嘅涼瓜就最夾。
創新傳統兼備
「有飯局」店名改得好，辛苦搵嚟自在食，有乜好過日日有飯局？舖頭幾位大廚閱歷豐富，一齊度創意菜式，唔難！老闆陳先生話：「我哋啲師傅去過新加坡、大馬、歐洲學師做廚，佢哋嘅自創菜式唔敢講獨一無二，不過算為傳統中式小炒加入新元素咁喇。」搞新意思，可以，但傳統小炒就要貫徹傳統做法：「豉油皇炒麵個麵底一定要炸過、生炒骨要即炸、亁炒牛河一定要加蛋絲同芝麻，聽落好濕碎，但堅持做就一定增加工序，𠵱家好少舖會做到足㗎嘞。」
講裝修，四個字形容晒──簡單整齊，陳先生解釋：「整齊亁淨最重要，羊毛出自羊身上，花多咗錢落裝修，最終成本咪又係落番喺客人身上？保持食物質素令客人滿意就OK喇。」有道理，況且枱櫈放得唔逼狹，街坊檔嚟講絕對坐得舒服。睇埋價錢，午餐、下午茶餐就大路價，小菜就$50至$70，不過碟碟飽肚兼好味，同女友嚟呢度開飯，斷估無詐型嗰隻囉。
鮮奶泡桂魚$78
用鮮奶泡浸原條桂魚，鮮奶嘅香、濃、滑完全滲透魚肉。魚面鋪上炸過嘅生麵條，齋咬脆卜卜，浸入鮮奶變腍入口一樣好味。
青蘋果脆牛腩$58
用蘿蔔、草果燜熟肉質較靚嘅坑腩，再加脆漿炸，上碟有青蘋果片墊底，以青蘋果肉同果汁調校出嚟嘅芡汁，味道酸甜醒胃。
柚子咕嚕斑柳$52
過癮在原個柚子上，師傅：「醬汁用柚子肉調校，唔似其他食肆用檸檬汁扮柚子汁。」班柳的確帶柚子酸澀味，真材實料。
焦糖咖啡雞翼$52
雞翼用白咖啡醃過，令雞翼顏色更靚。外層包住薄薄焦糖，唔太甜有咖啡香，上碟後焦糖快速凝結，增加脆卜卜口感。
麻婆脆豆腐$52
工序唔少，將平時做麻婆豆腐嘅用料榨菜、肉鬆同豆腐一齊蒸熟，然後逐件切開加脆漿炸，點麻婆汁食帶啲啲辣味。
秘製話梅排骨煲$58
師傅話：「𠵱家好多餐廳都取巧，灑話梅粉喺面就話係話梅骨，我就一粒粒話梅加落去咁燜排骨至8成熟再焗，會更入味。」
食客有Say
南：「隔三兩日就嚟幫襯，午市套餐幾抵食。」
軒：「呢度幾就腳，嚟過4次喇，會帶埋同事一齊幫襯。」
劉先生：「呢度嘅中菜做得幾有水準，成日嚟幫襯。」
搵食攻略
有飯局（23345567）
地址：紅磡黃埔新村民兆街16號地下
營業時間：7:00am-12:00mn
座位：50多個，設有卡座
人均消費：午市$20-$30，晚市$60-$80
有着數：於新張期間（至十月中）惠顧可享八折優惠
最好賣：焦糖咖啡雞翼