阿里巴巴創辦人及首席執行官馬雲矢言要喺十年內，爭取成為全球五百強企業之一，不過佢所講嘅五百強，唔單止係賺錢能力強，仲要係對全球有影響力嘅企業。馬雲創立嘅阿里巴巴網站，將傳統嘅商業活動搬到網上。
佢話，02年阿里巴巴全年只賺1元人民幣，03年每日收入100萬元，04年已發展到每日賺錢100萬元，05年再發展至每日繳稅100萬元。網站能夠成功，佢分析係阿里巴巴以中小企為對象，為佢哋賺錢；美國同業只顧為大企業節省開支。
仲有係創立咗「誠信通」，搵專人查核誠信通會員提供嘅資料，確保佢哋嘅誠信；同埋搞咗個「支付寶」付款系統，方便網民繳費。其實，當中有唔少係從錯誤學習，馬雲笑言退休後著書寫《1001個錯誤》，《男人的胸膛係被寃枉而長大的》！
不過，佢對請MBA學生有啲怕，原來2000年前佢已經請MBA學生，但現時八成走咗，「佢哋提出嘅策略好似好好，但做起事上嚟就麻煩多多」。對於香港嘅大學生創業比率低於內地，佢認為，係香港嘅生活太容易；喺國內好多大學生同傷殘人士搵唔到工作，「都去到淘寶網創業」。