港股上個禮拜成功向上衝關，破咗17500，成交大增，雖然禮拜五跌番少少，但係好友好明顯控制大局，期指結算前，個市都應該會喺高位。
恒指「3頂」破位，17500係短線嘅有力支持位，恒指跌番啲，形態係「造旗」，如果破旗炒上，會先試17800。短炒以造好贏面較大，之但係個市累積升咗好多，而且愈嚟愈接近18000關，炒家自然會小心好多，就算大戶玩吓即市震倉，都會好有殺傷力，估計一啲較為保守嘅炒家，會傾向炒賣大成交熱炒嘅國企股。
國壽C輪2464：如果要揀今年最矚目又帶挈股民賺大錢嘅國企股，相信大家都會諗起隻國壽（2628），雖然年內有唔少國企股都有好表現，但係講到「穩步上升」，就好難同國壽比。
國壽上升嘅特點係，慢慢升，間中又會大步炒一段，上個禮拜國壽又大步推高，升勢勁，成交大，企喺16元收市，尾市搶貨盤仲有啲狼狽，短期炒上嘅目標，保守啲都要訂喺18元，如果基金搶貨，應該會推向20元。
隻國壽C輪2464介紹咗幾日已經升咗唔少，但係成交就愈嚟愈勁，上個禮拜五就有2.1億元成交，你話犀利唔犀利，焦點窩輪向來有着數，升得快有人搶，跌落嚟趁低買嘅盤特別多。2464上日收1.45元，槓桿率11倍（有效6.3倍），引伸波幅31.9%，正股升上18元，2464應該唔會低過2.70元，正股跌穿15.20元沽出計數。
俊 樺