「獨在異鄉為異客，每逢佳節倍思親」，傳統上一家歡聚嘅中秋節臨近，月餅廣告都愈賣愈行，但正喺內地俾當局以「間諜罪」扣押嘅本港資深新聞工作者程翔，同太太劉敏儀就天各一方。
本身係虔誠佛教徒嘅劉敏儀噚日話，自己覺得生命中最重要嘅係有信仰，其他都係冇意思嘅。老公程翔一向係個無神論者，以前佢成日都好忙、好唔得閒，連《聖經》都唔肯睇，𠵱家佢喺呢段被扣押嘅期間，會睇吓《聖經》。喺與世隔絕嘅情況下，反而可以面對自己，呢啲本身係一個好好嘅經驗，令佢思考下有乜困難，然後點樣面對，只有面對困難，先至會有成長。從呢個角度睇，程翔可能「因禍得福」。
至於程翔案上訴問題，劉敏儀就話，𠵱家佢哋一方面仲喺度預備緊文件，一方面就等緊當局關於案件嘅進一步消息。