上月剛動過膽管手術的沈殿霞（肥姐），據知本月中秘密在瑪麗醫院接受手術，切除部份肝臟，之後轉入跑馬地養和醫院深切治療部（ICU），情況令人擔憂。昨日肥姐愛女鄭欣宜終打破緘默，在其九龍塘寓所外會見傳媒，她指肥姐情況穩定，入住ICU只是休息及檢查身體，但普通病人一般不會被安排入住ICU接受治療，欣宜所言難以令人信服，似乎對母親病情有所隱瞞。
現年59歲的沈殿霞上月因膽管炎接受通膽管手術，據可靠消息透露，肥姐本月中又秘密在瑪麗醫院進行部份肝臟切除手術，之後轉院到養和醫院入住深切治療部，病情似乎不輕。
強顏歡笑
「𠵱家情況OK穩定」
昨午鄭欣宜在肥姐好友陳淑芬陪同下，約下午2時在九龍塘寓所外向記者交代母親病情，引來大批傳媒採訪。短短8分鐘訪問中，欣宜初時表現淡定，後因記者不停追問肥姐病情而顯得焦慮緊張，一旁的陳淑芬見狀即不時搶答，以下為欣宜與記者的對話內容。
（欣：欣宜 記：記者 陳：陳淑芬）
欣：多謝大家關心，媽咪𠵱家情況OK穩定，上次做完膽管手術，對普通人可能係小手術，但媽咪體重又犀利，有糖尿病、高血壓，比起正常人需要更多休息。
記：有報道話佢做完膽管手術有排斥？
陳（搶答）：冇排斥。
記：肥姐係咪入住深切治療部？
欣（笑笑口）：係，惟有喺ICU先可以真正休息，可以做晒bodycheckup（身體檢查），唔係有乜嘢大問題，touchwood。
記：點解要喺ICU入面咁嚴重？
欣（吞吞吐吐）：因為上次我媽咪休息唔到，好多人都擔心嚟探媽咪，打電話畀佢，所以入咗ICU，冇乜事……休息唔到。
陳：因為好多人都好關心，驚大家亂傳，所以欣宜至出嚟同大家講。
欣：真係唔使擔心，畀佢休息多啲啦！佢會好番同大家見面。
記：精神方面點呀？
欣：幾好，成日同我傾偈，好胃口，食物要清淡，媽咪有糖尿唔可以食甜，血壓高唔可以食鹹，以前割過膽石唔可以食油，要戒口。
記：幾時可以出院？
欣：Aslongas佢可以完全好番，穩陣啲好。多啲休息，可以早啲出院。
記：你𠵱家係咪暫時唔返加拿大？
欣：陪媽咪先，佢呢個年紀特別擔心，噚日同爹哋一齊去探媽咪。
記：有冇其他毛病？
陳（一臉不悅地搶答）：你咁樣講，等佢好番出嚟同大家講啦！
記：ICU正常係咪唔畀入呀？
欣：唔入冇辦法休息，只係直系親屬先可以去探。
記：喺加拿大嘅婆婆知唔知？
欣：乜都知，個個都擔心。
陳：幫吓手，唔好亂咁報道，其實唔係咁嚴重。
各界關心
逾500網友留言祝福
另一方面，昨日仍有大批記者在養和醫院守候，但並沒見到欣宜出現，反而蕭定一、榮文蔚、白茵和陳友則先後現身。肥姐今次入院備受各界關心，除香港討論區上有網友「losyes」以「祝福肥姐早日康復專區」作標題，號召了逾500網友留言祝福外，連經常製作短片整蠱欣宜的網友「tien001」，也在YouTube製作了一段名為「肥姐GetWellSoon（一個View代表送上一個祝福）」的短片祝福肥姐。
採訪：魯萍、張俊銘
攝影：陳俊強、陳志嵐、娛樂突發組
