車人合一：橫濱傳媒搶住試　銀狼Stream擴空成功

車人合一：橫濱傳媒搶住試　銀狼Stream擴空成功

7月頭日本正式推出新一代Sream開始，廠方話明以「銀狼」為本，唔單止香港Honda迷，連日本汽車傳媒都好緊張，喺日本東京試車，個個試車前不停索料，睇吓新Stream係咪大咗兼仲好劈。我都唔執輸，一個箭步、鬆踭、打尖，試咗Stream，佢地台矮咗、車廂空間大咗，而且外形更Sporty，要劈絕對無問題，真係要快，就要睇埋2.0RSZ版。記者、攝影：黃婉冰

外形大變身「銀狼」為本

第二代Stream在外形上明顯不同，車廠強調是糅合了MPV的實用性、房車化的操控感和時尚外形，換句話講，新車擺到明要殺晒老、中、青三個不同Market。無可否認，本人較鍾意新一代Stream，可能是其外形較舊款有線條感，特別是修長而帶尖的車頭，看起來較Sporty、前衞，車尾雖然只屬小改，但尾燈鋪排較前清晰。上一代靈感來自「海豚」，今次以「銀狼」這種兇猛的野獸作藍圖，試過車後，我終於明白何解以「銀狼」為本，因為所帶來的敏捷反應和速度感，完全就像狼一般，又快又盡。

■新款車尾線條比上代較方，線條感較重，尾燈亦作出了少許變動。

■藍色冷光錶板，一入隧道唔使着燈一樣清晰可見。

■新車全用上三幅式賽車型軚盤，備有音響按鈕，好睇好用。

1.8版有i-VTEC夠力撐

兩個不同版本的Stream，分別是1.8入門版和2.0RSZ版，前者沿用了家族成員思域的i-VTEC引擎，後者則採用了一副為其度身訂做的R20A直4SOHCi-VTEC引擎，雖然外形相像，但行車表現卻各有不同。廠方將試車地點安排橫濱，加上落雨的關係，整個試車過程都在雨中進行，可以乘機試一試濕地時的表現。入門版1.8L經過鬧市再上Highway，感覺很輕鬆，因為七人車有房車的操控性，以女駕駛者角度來看，操控不費吹灰之力，反應亦夠快，對於要講求舒服、易操控的女兒家來說，1.8L是一部很好的家庭車。

精心布局偷位去到盡

試坐後座，空間亦明顯比舊款有進步，新車特別將長度、軸距加長20mm，所以布局依舊，但空間感明顯比上一代有增無減。首先是新車的A柱位改良，令駕駛視野更廣闊，加上超扁身油缸設於尾座椅下，配合慳位後懸掛組件，慳位第三排腳部空間，乘客唔怕坐到腳痹。

■新車「偷位」功夫做到足，尤其是無咗中間條大陣，蹺住腳坐都仲得。

■中排、後排座位拍低，空間即時大一倍有多，何止擺BB車、行李篋，搬屋搬寫字樓都得。

■大、中、細三個行李箱放晒都仲有大把位剩，「擴空」成績果然有進步。

橫濱試車花絮　去硬全球第二大「瘦身男女」唐人街

■試車日啱啱落大雨，正好試一試車廂的手工，無漏水、無雨水打在車上的噪音，好正。

■試車路段經過一個免費露天停車場，車身雖大，但依然可以一手軚扭入，倒後出車一樣無難度。

■你睇，橫濱女孩個個都着黑白色嘅衣着，好LolitaFeel。

■日本上高速公路要畀錢，私家車為600日圓，約港幣$42，嘩，貴過來回紅隧一轉。

■呢度係全世界第二大嘅橫濱唐人街，「瘦身男女」就係喺呢條街拍㗎。

■車廠安排入住新宿「CenturyHyatt」，係我去新宿嘅推介，可以睇晒全新宿嘅夜景。

RSZ可以更激劈

較跑化的RSZ，雖然和1.8版相差只是200c.c.，但感覺截然不同，起步爆炸力較勁，路面感強，即使在天雨路滑的情形下「快跑」，令我肆無忌憚咁加速再加速，這可能同新車改用上全新開發的特低地台有關，重心比上一代更低，加上扁闊的車胎，濕路入彎一樣可以平穩過渡。Sport模式的5前速半自動波，反應同樣敏捷明快，啱後生仔或愛劈車的人。

■跑版無晒音響按鈕，但就多咗個紅色「RSZ」字樣以資識別。

■RSZ版，男仔會較鍾意，起步更爽快、路面感更強。

■RSZ有晒包圍，包括一體式氣霸連霧燈，望落係跑啲嘅。

HondaStream1.8LSpecifications

引擎：1,800c.c.直4SOHCi-VTEC
馬力：140匹
扭力：17.7kgm
傳動：5前速自動波
車價：售價未定

HondaStream2.0RSZSpecifications

引擎：2,000c.c.直4SOHCi-VTEC
馬力：150匹
扭力：19.4kgm
傳動：5前速半自動波
車價：售價未定
查詢：合群汽車（23802231）