名師設計真係唔同啲！「利苑」員工制服由本地名時裝設計師夏嘉懋一手包辦，兩年前剛開業即成全城熱話，我第一眼見到覺得勁似OL，富時代感同時唔太花巧，夏嘉懋接受訪問時就講過：「制服係創意同服務業嘅結合，最重要係Listentoclients，設計時我會配合番室內設計等元素。」難怪香檳金色制服同餐廳淺金色桌椅咁相襯啦。
女裝制服小鳳仙企領，胸前有褶位，完全突顯女性線條美，返工着住咁靚制服嘅Jady點睇？「第一眼見呢套制服，覺得好突破，絕對唔似一般侍應制服。我甚至想着住出街，可惜公司唔畀。」靚就夠靚喇，實唔實用先？「質地舒服，有彈性唔拮肉，舉起手做嘢都唔會扯住扯住。」梗係啦，夏嘉懋選用意大利進口嘅Lycra，呢種布本身係用嚟做泳衣嘅彈性纖維紗，着起嚟舒服稱身，返工都開心過人呀。
記者：黃若茵
攝影：楊錦文
大閘蟹粉亁撈金山勾翅每位$298
大閘蟹蟹膏、蟹肉同粗身金山勾翅一齊炒，入口好香，配金華火腿上湯一齊食，味蕾無詐型。
缽酒軟殼蟹每隻$58
軟殼蟹Size比平常食到嘅大2至3倍。用生菜盞伴碟，包住軟殼蟹食，減少油膩感，入口清新。
靈芝花膠燉湯2位$238
靈芝、花膠、竹絲雞、杞子燉4個半小時，師傅話呢個湯好滋補，有消炎、明目等功效，老少咸宜。
利苑（22950238）
地址：中環金融街8號國際金融中心商場3008至3011舖