建於北宋開寶九年（西曆976年）嘅湖南嶽麓書院，有「千年書院」之名，同河南嵩陽書院、廬山白鹿洞書院及河南應天書院並稱為中國四大書院，地位極高。呢間平日儒雅樸實嘅書院噚日非常熱鬧，事關率領工商界代表團去湖南考察嘅煲呔，噚日一抵埗就「槓」咗去書院參觀，佢仲竟然夠膽當眾題字，喺名冊上寫咗「通才務實，教澤流長」八隻大字，莫非佢自覺已經得到愛好書法嘅曾太真傳，可以喺鏡頭前表演吓？
八方記得煲呔遲吓去中大講書，題目又係「務實管治」，咁鍾意「務實」，你估究竟邊個領導人點醒佢呢？至於題上面八隻字，煲呔就唔怕醜咁話，自己喜歡務實做事，亦希望人人都可以做到通才；其後去遊書院，行到一塊寫上「實事求是」嘅木牌度，佢又再自誇最喜歡實事求是。嘩，又「務實」又「通才」又「實事求是」，自吹自擂，唔係咁爭取機會hardsell呀嘛？去到人哋地頭，謙虛啲好啩，咪俾張春賢書記同周伯華省長笑就失禮啦。
記得喺去年5月，台灣親民黨主席宋楚瑜去到湖南訪問時，都有去嶽麓書院參觀。當時宋楚瑜為書院題咗16隻字：「湖湘道脈，明德揚善；天下至理，愈辯愈明」，宋主席啲字靚唔靚過煲呔見仁見智啦，但明顯宋楚瑜眼界比煲呔闊，而且都無趁機吹噓自己。
應向吳儀請教
八方覺得，煲呔既然一抵埗，就去到呢個近代中國史上知識分子推動改革的重要根據地（推動洋務運動嘅曾國藩以及討伐袁世凱的革命領袖蔡鍔等，都係學生之一，黃興墓亦在此山），煲呔係咪都要入「院」隨俗，諗諗點樣可以更好改革香港，尤其政改問題點向前邁步先好。
煲呔一連三日湖南之行，重點係今日。佢今日會出席中國中部投資貿易博覽會，介紹香港同招商都係其次，最重要都係同主理經濟事務嘅副總理、中國鐵娘子吳儀會面。呢期煲呔因為積極不干預政策搞到一鑊粥、聲稱要擴闊稅基同解決人口老化問題，結果推銷售稅推到全民皆反，可能都係時候請教一吓鐵娘子點收科。
至於陳方安生宣布唔參選特首，大家梗係好想知煲呔係咪鬆一口氣，可惜噚日煲呔喺教堂、酒會以及機場，三度拒答相關問題，只係話會「用心工作」。唔通係想話無咗陳太呢個威脅，終於可以專心搞選舉工作？
不過八方都不得不讚煲呔，臨上機前都專程出席香港公務員團體慶祝國慶文藝滙演，認真畀面。