10月11日立法會暑假後開波第一炮，一如去年畀咗個場煲呔發表施政報告（老董曾經改咗去1月發表，煲呔上任後撥亂反正）。
講真，係人都睇死煲呔成功連任之前，唔會有咩政策新猷，最多咪搞吓藍天白雲無呔工作間，費事最終自己攞嚟衰。
噚日民主黨搞施政報告期望論壇，有啲講者都好坦白咁話冇乜期望，當中表表者莫過於中大政政系副教授馬嶽，佢研究政治同政制，盲嘅都知道冇中央肯首，煲呔唔會畀普選港人，政改方面又硬係話畀策發會傾，咁即係政治方面可以係冇嘢，所以馬嶽唔會抱太大希望，佢話煲呔只要將政治嗰part擺前啲同寫多幾隻字，已經好好㗎喇。
年底講咗會落莊嘅白鴿黨主席李永達都相信政治一定冇好嘢，但佢稍後都會寫信畀煲呔，叫佢將策發會歸納出關於特首同立法會選舉主流意見進行諮詢，等大家有個公眾討論，算係比較積極少少。