（左起）何韻詩、蘇永康同張衞健成班人噚日拉隊去廣州幫劉培基新開嘅運動服裝店主持剪綵儀式，最近有傳張衞健已同女友張茜結婚，蘇永康話：「傳佢結婚嗰個禮拜，佢同我一齊孖鋪緊。」張衞健就大耍太極話等梁漢文結咗先輪到佢，不過佢好想生仔，仲發夢自己生咗個仔，點知睇真個樣，原來係生咗條魷魚，佢將個夢話畀女友知，張茜話自己點都唔肯生魷魚。