大概一個月前，何俊仁喺麥記無啦啦俾人打，打爆咗個鼻，有傳聞話同佢幫十姑娘打官司有關，但一哥天涯海角都捉唔到人。
今日，仁哥病況好番好多，佢竟然膽大包天，決定代表十姑娘去澳門出席澳娛嘅股東特別大會。好多人聽到都擔心仁哥安危，之不過仁哥就冇有怕，話自己一早講過，會繼續以往嘅工作，都冇得驚㗎啦。
仁哥話本港警方唔可以越境工作，加上覺得冇需要，所以冇警方人員保護自己去澳門。但隨行其實仲有佢律師樓嘅職員，所以唔係單獨行事咁危險嘅。
仁哥今次過大海，會用最省時及安全嘅直升機，不過佢仲好頭痕，事關唔知book唔book到晏晝嘅機位；如果唔得，就會改搭船；暈船浪事小，命仔緊要，仁哥都要小心行事先得。