泰國突然政變（九月十九日星期二午夜），總理他信有家歸不得，唯有自己放逐自己到英國。中貿林喺星期三上午，立即打電話到曼谷搵校友A，問佢情況如何，校友A與校友L移居泰國近二十年，在曼谷成家立室，入埋泰國籍，係我哋到曼谷遊玩嘅導遊，校友A對中貿林講得好輕鬆：「難得有一日假期，𠵱家同校友L飲緊茶，市面情況一啲都唔緊張，泰國人對政變早已習以為常，只要泰皇祝福啲軍佬，大家都會服從唔會出亂子。」
呢次係一九三二年泰國君主立憲以來第十八次軍事政變，一九九二年以來第一次，七十四年來平均每四年就有一次政變，似足美國總統任期，過往軍人當權，做兩至四年已經被認為「收夠籌」，領導人「收租期」夠長，如果唔乖乖地自動下台，就會阻住其他人發達，新嘅陸軍總司令會發動兵變，等佢登台做莊。泰國學生犧牲不少性命，七三年十月血流成河咁搞街頭革命，開始衝擊軍人，一路鬥爭至九二年後先至爭取到民主選舉文人政府。唉，點知呢位他信唔爭氣，身為大富豪，尚且貪得無厭，好弄權，以為自己係泰國李光耀，但冇李生咁叻咁廉潔，全無道德權威，只靠金錢利益收買，對批評佢嘅報紙就先抽廣告（叫晒商界大公司畀面，唔准落廣告於反對派），繼而打壓，對聽話嘅報紙就放廣告，放料，於是聽得擦鞋仔說話太多嘞，飄飄然到連泰皇「勸籲」都聽唔入耳，最後邊度會有運行吖！
校友A話曼谷人對他信並無好感，農民就好支持他信，因為佢肯派糖吖嘛。他信算係台灣陳水扁，對遊行示威請佢下台，視若無睹，講過退休又反悔，厚面皮到極。不過佢錯估泰國形勢，泰國不是台灣，有軍事政變傳統，有泰皇權威，執政者如果同時失去（一）曼谷人支持、（二）泰皇撐腰嘅話，軍隊就唔會同佢客氣，而泰皇亦係睇民意嘅啫，點會庇護一個失民心嘅政客吖！他信居然唔明白呢一點，抵佢落難咯。