永業證券8月初出事至今個多月，雖然負責人已被捕，但受害散戶就有寃無路訴。有位受害人向華華訴苦，聽完之後，真係要用「叫天不應，叫地不聞」嚟形容，要攞番股票可能遙遙無期。
佢話，自永業爆煲後有一段日子，班苦主等無可等，惟有自己主動去搵證監會跟進吓，點知證監好似「事不關己」，話已經交由接管人羅兵咸處理。好喇，咁去搵羅兵咸，點知又話有文件要畀證監睇，不斷你推我讓，令到班苦主擔心到幾額汗！
受害人眼見自己啲股票領取無期，仲要每個鐘都畀緊可能係天文數字嘅管理費用畀羅兵咸，真係唔知點算。佢哋之前仲以為賠償基金會幫到佢哋，點知最高賠償金額只得15萬元。
其實𠵱家每宗交易證監都有交易徵費落袋，點知𠵱家有事，就覺得證監錢就識收，出事就搵藉口。
其實，班苦主都係想盡快全數拎番屬於自己嘅股票，令損失減至最低，如果件事仲係解決唔到，佢哋話，唔排除有進一步行動。