全球集資額最高嘅新股──工商銀行即將來港上市，上個禮拜五，破天荒地將佢嗰本初步招股書擺上網任睇。華華不甘後人馬上攞嚟刨，發現工行搵咗十二大猛人做股東，同今年中上市嘅中國銀行一樣都係12人，唔通12呢個冧巴，今年會帶嚟好運。
其實，有興趣投資呢啲超級大新股嘅大孖沙，來來去去都係嗰班人，好似工行呢次搵嗰12個股東，有7個上次都有做中行股東。除咗國壽，另外六個都係香港富豪。中行嗰次有黃廷芳家族嘅信和置業，同埋九龍倉主席吳光正；但呢次工行則由中信泰富同埋榮智健取代。
另外，呢次見到新加坡同埋中東資金都威威，分別都有兩名入選做股東，尤其是中東資金，之前沙地阿拉伯王子已經開晒口，話想買中國銀行，呢次科威特同埋卡塔爾都可以做到工行股東，可以話威過沙地。
不過，最令到華華詑異嘅，係東亞銀行同埋平安保險，上次中行招股，兩個都有入股，每人仲科水14億。呢次工行企業投資者名單，居然兩個都冇份。但係，其實兩個機構同工行都有好深嘅淵源。
平安東亞同工行有合作
東亞同埋工行1998年合作成立工商東亞，喺香港做投資銀行同埋證券經紀業務，工行揸75%；東亞揸25%。至於平保，原來工行透過工銀亞洲同平保合作，喺香港成立咗平保（香港）做保險業務，工行仲揸14.93%股權。奇怪以東亞同平保，與工行咁深嘅關係，冇理由唔入飛支持；如果有入飛，冇理由工行唔畀佢哋入股。下次華華見到東亞主席李國寶或者平保董事長馬明哲，一定會問吓佢哋有冇入飛工行。