前幾日，《福布斯》公布全球富豪榜，股神畢菲特再度入榜排第二，有邊個散戶冇發夢自己有朝一日可以好似佢咁炒股發達。不過，發夢冇咁早，不如學吓股神點炒股。
今次要學嘅係另一個股神、國際知名投資者兼量子基金合夥人羅傑斯（JimRoger）。70年代同索羅斯創立量子基金嘅羅傑斯，有「商品大王」之稱，曾準確預測商品牛市，佢一早已認定，21世紀係中國嘅世界，所以將移居亞洲嘅目的地鎖定為上海、香港或新加坡，更身體力行，畀三歲女兒希爾頓（Hilton）學普通話。
噚日大陸報章《中國證券報道》同羅傑斯做專訪，記者問佢，航空股呢兩年都「凶多吉少」，東方航空、南方航空紛紛為中期業績出盈利預警，原因係油價步步高升，令到成本上漲，記者問佢仲係咪睇好航空股。
羅傑斯就話，油價高已經唔係新聞，成本高咗，航空公司自然加價，對航空公司係好事。佢仲話：「我好奇怪唔係好多人去買國航，但對我嚟講，反而係好消息，講明大多數人仍然唔相信航空公司會有好表現。我就最喜歡喺一般人懷疑嘅時候入市。」
如果羅傑斯嘅預測冇錯，今後5至10年，每個人都會買航空股，航空公司會好賺錢，會買好多飛機，價格競爭亦會開始，到時佢就沽出航空股，因為到時每個人都喺度買，呢個係周期性行業運作嘅規律。
喺散戶仲猶豫緊嘅時候入市，到佢哋追貨嘅時候沽出，從來都係大戶賺錢之道，今次股神畀晒貼士，但你夠唔夠膽跟？