做過國泰同電盈最高層嘅張永霖噚日話自己23歲前都冇認真讀書，後來因為失戀先至發憤圖強，努力讀書。佢噚日出席普通話節開幕時，更自爆自己喺36歲前都唔識普通話，後來因為要去台灣工作，先迫自己學普通話。佢又為自己平反，話傳媒成日叫佢做打工皇帝，佢認為打工就唔係皇帝，係皇帝就唔使打工！
講開張永霖去台灣工作，八方要補番一筆。話說最近台灣倒扁，本版記者約咗張永霖訪問，事關佢84年至87年係國泰台灣總經理，經歷過86年11月民進黨人計劃在桃園機場「跳機」事件。佢在訪問中憶述20年前往事，講番如何安排「施明德」及許信良由東京飛香港而中途不停台灣。
篇訪問稿上周刊出後，有熟悉台灣政情讀者來電質疑：施明德當時在台灣坐緊監，怎可能「跳機」？八方翻查資料，睇番當年報章，發現真係搞錯，計劃「跳機」者係許信良及施明德當時的妻子艾琳達，並無施明德在內，而由東京飛來香港的是艾琳達。
呢件事當時好轟動，香港報紙登足成個星期，八方未能及時查核資料，真係唔好意思，所以必須更正，及多謝讀者指正。