平時見到名模周汶錡（Kathy）多數都係喺天橋行騷，噚日佢暫時放低模特兒工作，輕輕鬆鬆擔任「淘大商場估大王」活動嘉賓，同20位參賽者齊齊格價估價錢。
Kathy事前唔知道貨品嘅價錢，只係憑直覺畀貼士參賽者去估，雖然幾個環節都估唔中，不過Kathy答案都極之接近。佢話閒時shopping都鍾意睇多幾間舖頭先買，又話已經十幾年冇嚟過淘大商場，覺得環境變咗好多，以前讀書嗰陣就好鍾意嚟呢度行街買衫。
賭城有斬獲
Kathy又講起佢之前同朋友去賭城拉斯維加斯玩輪盤，用25蚊美金（約200港元）買中咗個冧巴，結果贏咗800幾蚊美金（約6,300港元），運氣唔錯。
之前有報道話Kathy外籍男友送咗套過千萬鑽飾畀佢，Kathy解釋套鑽飾只係大會借戴，自己都唔會要求男友送，佢覺得時下嘅女性要獨立，唔需要男友送禮物，仲話自己平時都會自己畀錢買心頭好㖭。
