「大笑姑婆」除咗識笑之外，原來喊都好叻。早排關仁去銅鑼灣蒲吧，咁啱撞正佢同班friend坐隔籬枱，初頭關仁都聽到佢大聲笑大聲講：「唔係呀？咁都得？」跟住就拍枱哈哈哈啦。點知過咗兩粒鐘，大笑姑婆飲大兩杯，竟變咗做大喊姑婆，突然嗚嗚聲大喊，嚇到啲friend即刻搭佢膊頭安慰佢，當時有個侍應行埋嚟，諗住睇吓有冇嘢可以幫到佢，點知大笑姑婆個朋友同侍應講：「佢冇嘢㗎，佢次次飲大咗都係咁喊，等陣冇事㗎啦。」原來係咁，果然係大情大性喎。
斷背女歌手目中無人
「斷背女歌手」自從加盟咗「肥嘟嘟」間唱片公司後，一直都覺得自己好掂，所以態度愈嚟愈囂，有啲以前同佢幾熟嘅歌星都話佢變得好緊要，唔明點解佢會變得咁目中無人。有次某電台高層撞到佢，好主動咁同佢打招呼，斷背女歌手竟然唔睬人。咁電台高層當然好唔高興，唱片公司知道後都有話佢幾句，點知佢話呢啲叫性格，問你死未！哈！人總係咁樣，唔肯面對現實，佢阿姐一線都未到，搞到咁寸，真係自取滅亡。
口花吳明享齊人福
近期喺香港紅爆嘅內地演員「吳明」，高大外形已經夠煞食，原來佢把口仲好似「啷」過油咁，所以深受觀眾歡迎之餘，喺傳媒界亦甚吃香。近日吳明喺內地拍緊套「齊人之福」，戲中佢有幾個老婆都對佢生滋貓入眼，當冇記者探班時，佢啲老婆即刻向吳明投懷送抱，而佢亦顯得相當受落，仲好細心咁對啲老婆百般呵護，加埋佢嘅甜言蜜語，𠱁到班女暈晒浪。關仁都估唔到套劇都未上，佢已經率先享緊齊人之福喎！
Textby關仁