近期新股同窩輪都炒到㷫烚烚，上周三（20日）窩輪成交便高達96億元，招商銀行（3968）一批窩輪喺周五（29日）掛牌，可望掀起另一個炒輪高潮。
不過，雅虎《香港討論區》就有人呼籲大家支持不買窩輪。網友Inodarf勁支持，佢話自己有4年炒輪經驗，初期都有錢賺，收尾兩年當窩輪大行其道，無論睇啱睇錯都輸錢。佢去年底決定唔玩，轉玩期指，雖然期指都係畀大戶舞高弄低，但佢話比較公平，輸錢只因睇錯市，輸窩輪卻有一大堆搵笨理由，如引伸波幅和縮溢價等。
另一網友mamabb258坦言，雖然買輪嘅心態都係賭博，但買波落注時馬會有賠率，買幾多賠幾多，清清楚楚，但買輪，買中升跌又要計引伸波幅，但波幅隨時變都得，好難玩。而且，輸畀馬會可以當做善事，輸畀輪商乜都無。
但凡事都有兩面，網友小學生就為輪商講句公道話，指莊家提供任何遊戲，莊家嘅贏面永遠大於50%，否則邊有理由提供遊戲畀你玩。網友happyalexcha就話，唔通你去何生嘅賭場，落注買大開細輸錢，就話賭官出術咩！
報料電郵：[email protected]