今年21歲嘅應屆香港先生黃長發，兩個月前攞獎嗰陣，都出過吓風頭，為佢舊年參加港男落選嘅阿哥黃長興爭番啖氣。不過黃長發似乎後勁不繼，話咁快就冇晒聲氣，除咗出席啲柴娃娃嘅宣傳活動外，都仲未見佢有新嘢do。
狂昅金髮妹
好彩黃長發身邊有女伴錫番，條氣都可以順一順。關仁早前凌晨12點零鐘，喺中環Dragon-i夜店附近見到佢同着露背tee襯拖地長裙嘅女伴，各自拎住一袋戰利品現身，似係啱啱逛完街掃貨。但兩個人行到相隔幾個身位距離，表現都好避忌，墮後嘅黃長發不時四圍望，當行過一位正企街講電話嘅外籍金髮靚女身邊時，即時雙眼發光，打雀咁眼昅到實。
點知喺呢個時候，露背女伴失驚無神擰轉頭，嚇到黃長發視線快速轉移，望住對方咪咪笑，唔知佢係緊張得滯定係天氣太熱，離遠都見佢狂標汗，露背女伴見佢成身濕晒，即時遞張紙巾畀佢抹汗，木口木面嘅黃長發就邊抹邊唧出尷尬笑容，之後佢哋企喺街頭各自傾咗一陣電話，露背女伴至黐喺黃長發身邊，mark實佢一齊落蘇豪區再逛過。
