「美人」以前喺演藝界俾大家捧到上天，之後嫁咗個有米老公就退出，唔知羨慕死幾多女人。但其實美人嘅生活並唔開心，關仁聽朋友講，話原來美人本身好要面之外，妒忌心仲極重，只要有人喺佢面前讚第二個女仔靚而唔讚佢，美人塊面就會黑過鑊底，久而久之，啲女性朋友俾佢激走晒。佢錢就大把，但近年佢老公出邊有第二個女人，美人想搵個朋友呻吓都冇，其實都幾淒涼。
歌仙失蹤大佬心淡
繼幾個月前「痰罐」嫁女，細佬「歌仙」唔畀面飲喜酒之後，上星期痰罐娶新抱，歌仙依然唔肯出現，搞到痰罐又嬲又心淡，尤其是現場班親朋戚友成晚追問佢細佬點解唔嚟，真係解畫都解到口水亁。不過，聽聞歌仙出年4月紅館開騷個檔期已經落實咗，早排佢仲叫痰罐幫手做番part棟篤騷，但痰罐未回覆做唔做。其實痰罐大可以收番歌仙一百幾十萬一場酬勞，當係等對方知難而退又好，或者畀番啲顏色細佬睇吓都好吖！
阿零媾仔前夫支持
失婚港姐「阿零」自從同前夫「獅子頭」分開，原來正秘密發展第二春，佢日前俾記者踢爆同攝影師男友出埠充電，態度親暱，為咗保護情苗，阿零決定低調處理感情。關仁聽講佢哋係一齊返教會，見面多咗先撻着，而獅子頭亦好快收到風，知道前妻搵到新歡，殊不知佢冇妒忌不特止，仲祝福佢哋，甚至有時三人行食吓飯，真係夠開通。關仁覺得獅子頭嘅行為愈嚟愈似歌手「檸檬」個阿爸「老死」，可以同前妻和前妻老公保持友好關係。
關仁