旺角拔萃男書院附屬小學校舍起咗一座鐘樓，校方噚日請咗本港時間揸Fit人天文台台長林超英同一眾學校高層，於傍晚6點19分為鐘樓亮燈。揀6點19分係好有科學根據，原來噚日係中國氣節「秋分」，林台長話噚日剛好日頭同夜晚各佔12個鐘，太陽喺正東出，正西入，嗰個時間夕陽中間位置，剛好落地水平線位置。噚晚秋風送爽，林台長講笑話正好係「平分秋色」嘅日子。
講返男拔點解要起呢個鐘樓，話說已故資深大律師、該校校董張奧偉爵士喺九十年代初話，每一所一流出色嘅學校，都應該有一座鐘樓，因鐘樓可用嚟提醒學生唔好蹉跎歲月，把握學習機會，所以主張學校興建。不過佢老人家喺03年尾過身，等唔到鐘樓落成。