早兩星期講過，美國「股神」畢菲特係eBay網上拍賣心愛2001年「林肯城市車」（LincolnTownCar），為慈善機構GirlsInc.籌款，並會為新車主擔任司機。昨日終於有結果，eBay公布由一個叫做「BillZanker」嘅網友以7.32萬美元（56.8萬港元）投得，以100美元之差，擊倒第二高叫價嘅「Maxcjb」。
係人都知，股神近年最成功嘅拍賣，係同佢一齊食餐飯兼分享投資心得嘅慈善午餐會；今次股神再下一城，將自己嘅愛車連同私人車牌「Thrifty」（節儉）拍賣，不過成績就差啲。其實除咗賣車外，最矚目係佢竟然「紆尊降貴」，戴上司機制服帽，會喺美國奧馬哈市機場恭候拍賣中標者。股神不惜「瞓身演出」，都係為咗幫千金蘇絲做董事嘅慈善機構GirlsInc.籌款。今次拍賣底價係2.5萬美元，同午餐會一樣，當時仲諗住籌到100萬美元，用嚟扶助問題少女返回正軌。
父女情咁偉大，可惜愛車冇乜人吼。拍賣由9月12日開始，22日截止，但係12日內僅得63個叫價。只得咁嘅成績，或者係佢班fan屎，只在乎曾經擁有，不在乎天長地久，而「股神」亦無縮沙，照做柴可夫是也。
報料電郵：[email protected]