男歡女愛本來好平常，但發生喺豪門巨宅內就特別引人注目。中間分界霍家二少同最美麗港姐朱玲玲終於證實已經離咗婚，成件事由女方做主導，先撇除夫姓、再向外自爆。
霍震霆噚日如常出席「2006年度東亞運動會聯會委員會會議」，當冇事發生，不過一講到感情問題就封嘴，一味話「唔方便答私人問題」、「要講嘅之前都已經講過。」記者死纏問離婚事見報，會唔會影響佢處理業務？霍公子終於中招，「我諗呢啲我會分開嘅！」
二人04年已正式離婚
八方之後再打畀霍震霆，問佢會否祝福舊愛開展新生活，霍公子罕有咁話：「OK啦，都會。不過我都唔多講喇，多謝關心。」就咁，公平啲講，離婚無人想，但分開咗仲可以大大方祝福前妻，總比登報狂數對方不是嚟得有風度。
今次離婚唔使登廣告已可以公告天下，據知完全係朱玲玲一手安排。舊年10月佢處心積慮先除去夫姓，用番LolettaChu出席活動，一心以為外間會知佢已經離婚，但國家領導人子女嘅婚姻狀況，隨時等同國家機密，外人亂估得嚟真係唔敢亂講，所以仍然傳言四起。
朱玲玲今次就託好友葉蒨文向相熟傳媒傳話，話自己因為同老公性格不合，早響97年已經分居，兩年前，即係04年就正式離婚，各自回復單身。性格南轅北轍嘅朱玲玲同霍sir早年已經唔係咁happy，但因為三個仔仲細，所以盡量遷就吓。
家吓啲仔大喇（啲新聞同緋聞仲勁過老竇老母），於是雙方同意離婚。據講話老爺霍英東，都好尊重阿仔同新抱嘅決定。點知朱玲玲話咁快就同「上海姑爺」羅康瑞傳緋聞，葉蒨文解畫朱玲玲未選港姐前佢哋已認識，同佢此時宣布離婚無關，絕非方便發展戀情。哈！唔好怪八方多心，點解只係話緋聞同宣布離婚無關，無話佢兩個唔係好朋友喎。