市民參加旅行團，如目的地需要簽證應避免過早辦理或委託旅行社集體代辦，以免因不成團而白白花費簽證費。
讀者梁小姐稱，她原本打算8月底與友人到柬埔寨旅行，「我同六個朋友一早夾好假期，一齊參加美麗華旅運嘅柬埔寨四天團，諗住去吳哥窟見識吓！不過我哋係分開報名嘅，因為去柬埔寨需要做簽證，於是就搵美麗華代辦。」
不過，當梁小姐取回簽證翌日，卻收到通知，因人數不足未能成團，會退回團費，她得悉後大感不快。「我做收銀員嘅，放假要自己搵到替工先得，去唔到旅行已經失望啦，仲要我損失埋做簽證嗰180元；其他朋友報名嗰陣，就有人提醒佢哋成咗團先做簽證，所以冇損失。」
美麗華集團發言人解釋，旅行團目的地如需簽證，一般也是在成團後集體辦理。「大部份要做簽證嘅地方，都可以喺七日內做妥，所以旅行社代辦簽證，多數都會等到夠人成團，然後集合埋一齊辦證，之後再喺機場交番啲護照畀客人，反而個別咁同客人代辦簽證，我哋人手同時間仲用多咗！」
由領事館收錢
若客人要求提早取回護照，則可能出現風險。發言人續說：「少數客人可能喺旅行團出發前，需要護照離港，我哋會優先同佢辦證，但咁樣無論成唔成團，發出簽證嘅領事館都要收錢，我哋代辦簽證，唔會收任何手續費。梁小姐其他朋友因為冇要求出發前攞番護照，所以冇簽證費損失。我哋會提醒同事，要再向客人解釋清楚，防止同類誤會再發生。」
檔案編號：0817032