有沒有統計顯示過，人平均由幾多歲起錶懷舊？
十歲人仔？那是搏命諗我將來會點點點的時候。廿歲？都係向前望以為「個世界仲唔係我嘅?!」起碼到超過卅歲，領教過社會和生命可以怎樣發爛渣的逼真面具，始知前無平路，後有好景。
RobertAltman，八十有一，他的《在晴朗的一天收檔》懷舊到天荒地老，講一個老牌電台節目的曲終人散。明白的，每天起床梳洗回魂，照鏡就見恆香和榮華兩塊老餅雙鬼拍門提醒你年事已高，臉上皺紋橫行，黑髮變成小數族裔，明啦。成八十歲，難道仲玩展望將來咩，回望過去視野遠好多。
自己同自己埋單計數，光榮謝幕，拍了幾十年戲的Altman，自己不也是個長壽節目？片中最逗得我心花怒放的，不是它可以用音樂喜劇去講死亡，輕輕的我死了，正如我輕輕的來；也不是梅（麗史翠普）姨和LiliTomlin一對超齡Twins姊妹花的唱造俱佳，她們開演唱會的話我率先豪幾嚿水支持；而是節目中一再出現的廣告客戶的說話。那些電台廣告，多麼天真爛漫，多麼直接而理直氣壯：X牌穀物早餐，營養高、very「骨」（good）；XX牌膠紙，黐勻全屋好使得！七十年代產品推廣的手法，實在純樸得可愛，一個阿伯全程直豎拇指「人人搬屋好」就得，怎像現今一堆明星扮馬戲班古靈精怪賣可樂，都唔知做乜！
廣告長青口訣有云：K.I.S.S──KissItSimpleStupid，未嘗不是真理。