聚龍灣，清遠市佛岡縣一個剛開幕大型溫泉度假村。名字背後有古講：好耐之前，四海龍王去完王母娘娘嘅蟠桃大會，駕雲返歸見湯塘山山巒起伏，發酒瘟瞓覺流口水，口水（龍涎水）滲落地底形成𠵱家嘅溫泉區──咪住，嚟聚龍灣浸全國最大嘅沖浪溫泉，咪即係間接同龍王打茄輪？係呀，話埋你知有40幾個露天溫泉，有排你打呀……
記者：蘇振鵬 攝影：陳陶鈞
模特兒：Natalie、Ranee（STAGEMODELS）
鳴謝：關鍵旅行社有限公司、
深圳巿旅遊（集團）公司
全國最大衝浪溫泉
新開嘅聚龍灣天然溫泉度假村面積27萬多平方米，喺清遠，呢類溫泉度假村多到唔恨，所以噱頭一定唔少得。據稱，呢度有全國最大達2,500平方米嘅沖浪溫泉、兒童專用嬉水溫泉、大型水上表演，最勁係有40幾個特色露天溫泉池。浸得晒，代表你已經同龍王間接打茄輪40幾次，不過唔使怕，龍涎水泉眼溫度高達82℃，仲含氡、鈣、鉀、鈉、鎂等20多種放射性微量元素，前者更有改善哮喘、便秘、失眠、神經衰弱等等等等病症嘅功效，不過最重要係──舒服！由深圳熬3粒鐘過嚟喎大佬，幾大都要浸到甩皮甩皮再甩皮啦。
去佛岡縣食消夜
浸完溫泉，無甩皮，不過肚仔餓。講到食，呢度係清遠，走地雞走唔甩。離度假村15分鐘車程嘅佛岡縣正係食雞好地方，講真，佛岡縣買手信嘅地方唔多，但食肆就大把，推介酒樓「南海食街」，清遠雞、客家菜好有水準。酒樓之外，夜市一樣咁熱鬧，成條街都係營業到半夜嘅小食檔、大牌檔，為食？無有怕，驚你花多眼亂心大心細唔知食乜好咋。
登廣東八大名山
又浸又食，仲欠郁喎！度假村附近正正有個觀音山，可以畀大家舒展筋骨。觀音山度度都有，香港都有個畀香灼璣霸佔咗嘅觀音山，但清遠觀音山海拔高1,288米，係冠名觀音山之中最高嘅，有朵叫廣東八大名山之一，山上面景點唔少，好似王山寺、龍宮、龍床、靈水湖等，仲有落差過百米嘅瀑布群，行完一趟最啱返去聚龍灣再浸過。
自己去
聚龍灣天然溫泉度假村（86-7634632888）
地址：廣東清遠佛崗縣湯塘(京珠高速湯塘出入口左轉1公里106國道旁)
1.深圳乘地鐵在竹子林站下車，往福田汽車站轉乘往清遠巴士（約¥80）到清遠巿汽車站，再轉乘往湯塘巴士（約¥50），中途會經過聚龍灣度假村，全程約4小時。
2.度假村乘的士（約¥30）往佛岡縣，車程約20分鐘。
3.佛岡縣乘的士（約¥50）往觀音山，車程約25分鐘，問定的士司機電話號碼，方便電召的士回佛岡縣。
跟團去
關鍵旅遊（23622022）
地址：紅磡馬頭圍道37號紅磡商業中心B座4樓
團費：2天團$399起，包入住聚龍灣天然溫泉度假村1晚，無限次任浸溫泉、旅遊車、三餐，行程包括英德英西峯林風景區、小布達拉宮「彭家祠」等；3天團$539起，包入住韶關新華或同級酒店1晚、聚龍灣天然溫泉度假村1晚，無限次任浸溫泉、旅遊車、三餐，行程包括奇石風景區、陽元石、乳源大峽谷、亡命高空表演等。
查詢：www.kwankin.com.hk